خاص لبنات سنه اولى جامعه

 .........................................................................

اول سنه ممكن تحسي بضيقه و اكتئاب وده بسبب انك دخلتي على مجتمع كبير وغريب وممكن تكوني انطوائيه وممكن توصل معاكي انك تعيطي وغيرو كتير بس احب اقولك ان الايام كفيله تظبط كل ده وهيجي عليكي يوم تقولي " الله دي ايام الجامعه دي كانت احلى واجمل ايام اه لو ينفع تتعاد تاني " وموضوع انك تخافي وتضايقي ده طبيعي جدا

............................................................

 حاولي على قد ما تقدري ميكونش ليكي اعداء في الجامعه عشان انتي متتوقعيش العدو ده ممكن يعمل فيكي ايه عشان يوقعك او يضرك فعلى قد ما تقدري ابعدي عن المشاكل

...............................................................

مش كل من هب ودب تديلو رقمك مش اي بنت تطلب رقمك تديهولها ما هي ممكن تنشر رقمك ممكن تبعتو لشاب ممكن حاجات كتير اوي فانتبهي ومتديش رقمك الا للناس اللي بتثقي فيهم 

...................................................................

فلنفرض انتي في الجامعه وتعبتي او حسيتي بمغص .. الخ مهما حصل متاخديش اي حبوب من حد حتى لو كانت مغلفه بعلبه دوا متاخديش اي حبوب وخلي دايما معاكي في شنطتك مسكن او دوا احتياطي للظروف دي

....................................................................

انا معاكي ان انتي داخله على مرحله جديده وعاوزه تكوني مميزه وشكلك حلو بس خدي بالك "الشىء ان زاد عن حده بينقلب ضده" بمعنى انه تهتمي بنفسك بس بحدود .. سمعت من حد في الكليه بيقول" استعجبت من شكل بنت اول يوم ليها في الكليه بتكلمني وهي اصلا مش عارفه تمشي في الكعب اللي هي لابساه ومش عارفه تشوف من اللينسيز اللي مركباها ولا حتى تعبيرات وشها واضحه من كتر الميك اب اللي حطاه !!!!" .. طب ليه نعمل كده ونحط نفسنا في المواقف دي ده " الجمال في البساطه^^" يعني كل ما تبقى الحاجه سيمبل كل ما تبقي احلى واجمل ودايما بنقول " الطبيعي يكسب" :) ^^

......................................................................................

مش هتكلم في موضوع اللبس لان ده بيبقى حسب اقتناع الشخص وحسب شخصيتو بس في بعض المظاهر بتبقى معروفه انها مستفزه واللي بيشوفك بيقول عنك كلام مش لطيف فأحنا على قد مانقدر نلبس اللي احنا عاوزينو بس بطريقه متستفزش الناس يعني وحاولي على قد ما تقدري تحققي معادله اللبس الشيك واللي يرضي ربنا مش صعبه والله سهله جدا

................................................................................

هيقابلك شباب كتير بيبقى غرضهم انهم يفتحو كلام ويتكلمو معاكي ويتحججوا بمحاضرات او غيرها عشان يفتحو كلام (ودول كتير يعني) اوعي تسمعي لكلام حد فيهم خدي بالك الراجل اللي بجد مش محتاج يفتح معاكي كلام ولا يتعرف عليكي ولا يقرب والكلام الاهبل ده الراجل اللي بجد مبيعملش الحركات دي والنقطه دي بالذات احب اوجهها اكتر للمغتربين اللي زي حالاتي كده في بلد مغلقه احنا خبرتنا في الحياه قليله ومقابلناش ناس كتير عشان نعرف هل ده كداب ولا صادق ولا ايه فمتتخدعيش بأي كلام يتقال لان الكدب مفيش اسهل منو ! فحافظي على نفسك عشاان يجيلك ان شاء الله اللي يحافظ عليكي :)

............................................................................

الجامعه هي مرحله دراسيه زيها زي الثانوي زي المتوسط يعني متقوليش " انا خلصت ثانوي بقا وخلاص جامعه ايه اللي هذاكر فيها ده انا ناويه الجامعه دي هتبقى للعب والترفيه !!" خدي بالك اللي مستواه بينزل عمره ما بيعرف يرجعو تاني ومفيش حاجه هتثبتك في المجتمع الا شهادتك من غيرها انتي مين ؟ قوليلي انتي مين؟ انتي ملكيش اي تعريف من غير شهادتك

......................................................................

متصاحبيش واحده عارفه او معروف عنها انها مش كويسه بحجه " انا بمشي معاها بس ومش هتأثر بيها" مفيش حاجه اسمها كده ده الصاحب ساحب والخيانه بتيجي من القريبين منك وياما سمعنا قصص كتير عن واحده في مصيبه ما يعلم بيها الا ربنا وحياتها اتدمرت بسبب صاحبتها !!! فخدي بالك من اللي هتمشي معاهم اوي ونقيهم بالراحه ومتستعجليش ده غير ان لو حد ميعرفكيش هيبص للي انتي ماشيه معاها وهيقول دي صاحبتها فأكيد هي زيها .

.....................................................................................

حاولت اكتب عن اهم حاجات حسيت البنات بيقعو فيها لما بيدخلو الجامعه وبقول الكلام ده لنفسي قبل ما اقولهولكم .. ^^

ان اصبت فهو من الله وان اخطأت فهو من نفسي ومن الشيطان :)

و السلام عليكم ^^